Israel-in a ram chhim lama awmte hmun him lamah thiarchhuak
Israel chuan Gaza Strip-a airstrike a neih hnuah, Palestinian-ten rocket hmanga an rawn beih let venthawn thilah, an ram chhim lam Gaza Strip hnaiha awmte chu hmun him lamah a thiarchhuak.
Kan TV chuan Israel hian zan lamah Palestinian-te an chet a hlauhthawn avangin, Palestinian ram bul hnaiha cheng Israel mi 2,000 chuang chu a ram laili lamah a thiarchhuak tawh a, hotel-ahte awm tir an ni tih a sawi. Sderot khuaah chuan an khuaa kum upa zawk leh damlo mi 4,500 velte sawnchhuahna tur chu municipality-in an buatsaih mek bawk.
Israel defence minister Yoav Gallant chuan Gaza hnaiha awm local council hotute hnenah inralring ring turin a chah a, hemi rual hian anmahni leh an ram venghim turin Israel Defense Forces (IDF) leh security force-te an inbuatsaih thu a sawi.
Thawhlehni khan Israel sipaite hian Gaza-a Palestinian Islamic Jihad movement (PIJ) hruaitute awmna building leh apartment-te chu fighter jet hmangin a bei a, Gaza health ministry chuan Israel sipaiten airstrike an neihnaah hian Palestinian mi 13 thiin, mi dang 20 chuang an hliam a, thi zingah hian civil mi 10 an tel tih a sawi a ni. Israel sipaite hian PIJ commander pathum an that a, PIJ chuan phuba an lak tur thu an sawi bawk.