Pakistan PM-in buaina siamte na taka chhanletah an vau

Pakistan prime minister Shehbaz Sharif chuan eiruk thubuaia man, prime minister hlui Imran Khan-a thlawptuten ram chhung hmun hrang hranga buaina an siam chu a dem thu sawiin, buaina siamte chu na taka chhan letah a vau.

Imran Khan man a nih hnuah amah thlawptuten lungawi lohna an lantir avangin, ram chhungah buaina nasa tak chhuakin, sipai hmunte an beih bakah, sorkar building leh bungruate pawh an tichhe tel bawk.

PM Sharif chuan public property beih tel chu firfiaka chetna leh, ram hmelmate chet dan a ni tih sawiin, heng thila mawhphurtute chu hremna na tak pek an ni ang, a ti.

Ram chhunga sorkar thil tam tak tihchhiatnaah Khan leh a party, Pakistan Tehreek-e-Insaf (PTI) chu mawhphurtuah puhin, 'Kum 75 chhungin hetiang thil hi kan ramah kan la tawng ngai lo. Mi tam tak nunna derthawngin an siam a, ambulance thlengin an hal a ni. Ram hmelmate ang maiin kan sipai hmunte pawh an bei tel a ni," tiin a sawi. Imran Khan man a nih chungchangah, al-Qadir Trust case-ah manna turin finfiahna a awm vek a ni, a ti bawk.

Imran Khan hi Thawhlehni khan National Accountability Bureau (NAB) thupekin, Islamabad High Court-a corruption case hearing neih tura a kal chu court compound chhungah man a ni.

Nimin khan Imran Khan-a thawhpui hnai tak, foreign minister hlui Shah Mehmood Qureshi pawh man a ni ve leh bawk. PTI chuan kum 66 mi, Qureshi hi Islamabad police-ten zingah manin, an hruai chhuak a, an dahna hmun pawh puanzar a ni lo tih an sawi.