Myanmar sipai sorkarin silai nena inpete lawmman pawisa fai pek tiam
Myanmar sipai sorkar chuan an rama sipai sorkar dodala beitute chu an silai leh ralthuamte nena inpe turin a thlem a, pawisa fai pek a tiam bakah dan an lo bawhchhia a nih pawhin an hrem hun tur tihtlem sak a tiam.
Nilaini khan sipai sorkar chuan ngenna hi siamin, sipai sorkar dodalna hrang hranga tel, People’s Defense Forces hnuaia mite pawh sipai sorkar chu zawm turin an sawm. Anti-military organisation-te chu mipuite rilruah silai hlauhna tuhsak a, pawisawilote chu sipai sorkar dodal tura dik lo taka an rilru hnehsakah a puh bawk.
Sipai sorkar kuta inpete chu a hmain pawikhawihna hrang hrang - tualthah, pawngsual leh midangte tihnat chungchangah lo inhnamhnawih mah se, sorkar chuan an thil tihsual azirin hremna pawh a tihnep sak dawn a ni, a ti. Hei bakah hian silai leh silai mu pe luttute chu an ram pawisa, kyat maktaduai 7.5 (USD 3,500) thleng pek an ni dawn.
Tualchher silai thehlutte chu kyat nuai 5 pek an ni dawn a, mortar leh rocket thehlutte chu tam tham tak peiin, bomb phur thei drone pe lutte chu kyat mtd 5 pek an ni bawk ang.
People's Defence Force member 502 chuan thuneitute be pawhin, sorkar kuta inpek an duh thu an sawi tawh niin tun thla tir lam khan information ministry chuan a lo sawi tawh a ni. Hetih lai hian civil sorkar aiawhtu atana din, National Unity Government chuan sipaiten thuneihna an chelh hnuah, sipai sorkar duhlotu pawl chu sipai leh police 13,000 chuangin an zawm tawh tih an sawi ve bawk.