Israel sipaiten Gaza Strip beih chhunzawm

Israel sipaiten nimin khan a ni thumna atan Gaza Strip an beih chhunzawm a, mi 27 an thi nia sawi a ni.

Nimina Gaza Strip beihnaa thi zingah hian Palestinian Islamic Jihad movement hruaitu eng emaw zat an tel a, hliam tuar mi 70 chuang an awm bawk. PIJ chuan an pawl hnuaia rocket launch unit commander, Ali Ghali chu Israel sipaiten beihpui thlaknaa thi zingah a tel tih an sawi.

Nilaini zan khan Gaza Strip aṭang hian rocket 400 chuang velin Israel chhim lam kah a ni bawk. Mahse Israel missile defence chuan rocket tam zawk hi a lo kapthla a ni.

Gaza Strip-a inbeihna thleng avang hian India rama ni thum cham tura zin, Israel foreign minister Eli Cohen chu a rawn thlen ni, Thawhlehni zan khan an ram lamah a kir leh nghal.

Tun ṭum hi kum khat chuang hnua Israel-in Gaza a beih leh nasat ber nia sawi a ni a, kumin chhungin Gaza-a beihnaa Palestinian mi thi 100 an chuang tawh a ni.