Pakistan Supreme Court-in Imran Khan chhuah turin hriattir

Pakistan anti-corruption body-in prime minister hlui Imran Khan an man dan chu dan kalh a ni tiin Supreme Court chuan a sawi a, chhuah nghal turin Ningani khan a hriattir.

Imran Khan hi Thawhlehni khan National Accountability Bureau (NAB) thupekin, Islamabad High Court-a corruption case hearing neih tura a kal chu court compound chhungah man a ni. Ningani khan Supreme Court chuan Khan-a'n court-a ngenna a thehluh chu ngaihtuah, hearing neihna inlan tura a kal man a nih chungchangah NAB chu na takin a sawisel.

Chief justice Umar Ata Bandial chuan registrar phalna tel loin court compound-ah mi tumah man an ni ngawt thei lo tih a sawi a, "Court-a a inlan lai mek a nih avangin lo man kher kha engnge a awmzia?" tiin a zawt.

Imran Khan hi NAB kutah a awm mek a, an hrenna hmunah tihnawmnah a tawh bakah, washroom hman pawh an phalsak lo niin a sawi. A ukil-te chuan Khan hi tihhlum tuma phiarruk a ni tiin, a ei turah pawh insulin telhin, heart attack neihtir an tum a ni, an ti. Nimin khan bail a dil chungchangah Islamabad Court-ah a inlan a ni.

Khan man a nih hnu hian a party, Pakistan Tehreek-e-Insaf (PTI) member-te chuan ram chhung hmun hrang hrangah lungawi lohna lantirin, hmun tam takah buaina a chhuak. Police-te chuan an ram khawpui, Islamabad-ah punkhawm khapna, Section 144 hman puan chhunzawm zel a la ni tih an sawi a, vawiina nawrh huaihawt tumte pawh buaina siam zawnga che lo tura vaukhanin, buaina siamte chungah na taka action lak a nih tur thu an sawi.

Ningani khan Khan-a thawhpui hnai tak, PTI hruaitu Asad Umar, Fawad Chaudhry, Shah Mehmood Qureshi, Ali Mohammad Khan, leh Senator Ejaz Chaudhry-te man an ni a, nimin khan party senior leader pahnih, federal minister hlui Shireen Mazari leh Punjab health minister hlui Dr Yasmin Rashid-te man an ni leh bawk. Khan tih loh, PTI hruaitu dangte hi Maintenance of Public Order (MPO) hnuaiah man an ni.