Eurovision Song Contest-ah Ukraine President thusawi remti lo

European Broadcasting Union,-ah Ukraine musician leh Ukraine fan-te inlan dawn mah se, Ukraine President erawh a inlan ve phalsak a ni lo.

Ukraine president Volodymyr Zelenskyy chuan zanina pan-continental music competition, Eurovision Song Contest final neihnaah video kaltlanga thusawi dil mah se, Eurovision tichhuaktu European Boradcasting Union chuan non-politican event a nihna chu bawhchhiat a nih dawn avangin an remti lo tih an sawi. President Zelenskyy hian video kaltlanga thu sawi a dilnaah hian, Russia leh Ukraine ram indona thleng mekah ram dangte chu Ukraine thlawp tur leh, Russia dopui turin sawm a tum nia sawi a ni.

Kum 1957-a din, Eurovision hi politics nena inkaihhawih lo tura duan a ni a, intihsiakna neihah pawh political lyrics, sign leh symbol tihlante pawh khap a ni. Mahse hetichung hian politics lam aṭangin a inthiarfihlim fel vek thei bik lo. Kum 2022, February thlaa Russia-in Ukraine a run hnuah, intihsiaknaah hian Russia tel khap a ni a, nikum khan sorkar laka lungawi lote laka Belarus sorkar chet dan avangin an ram pawh hi an tel khapsak an lo ni tawh bawk.

Nikuma Eurovision Song Contest-ah khan Ukraine chu pakhatna a ni a, pakhatna hauhtu ram hian a kum lehah intihsiakna hi a thleng ṭhin a, mahse Ukraine hian indona an hmachhawn mek avangin an aiah UK-in a lo thlensak a ni.