Israel leh Islamic Jihad-ten Inkahhai puan an remti
Israel sipai leh Gaza Strip-a Islamid Jihad movement chuan ni nga chhung an inbeih hnuah inkahhai puan an remti niin Palestinian official-te chuan an sawi.
Egypt hmalaknain inkahhai puan tura inremna hi siam a ni tih sawiin, nizan dar 10 aṭang khan hman ṭan tura tih a ni. Egypt chuan he inremna hi zawm ṭha turin pawl pahnihte a ngen tih an sawi bawk. Hetih lai hian Israel official lam chuan inremna siam chungchangah hian thuchhuah engmah an la nei lo thung.
Israel sipaite chuan kar liam ta Thawhlehni aṭang khan Gaza Strip-ah hian ṭum eng emaw zat airstrike a nei a, hei hi rocket hmanga Israel beitu Islamic Jidah chhanletna a ni tih sawiin, an pawl hruaitute leh an hmunhmate an bitum tih an sawi. Iran thlawp, Islamic Jihad hian Israel chu rocket hmangin a kap chhunzawm ve reng bawk
Ngawrh taka ni nga an inbeih chhungin, Israel sipaite chuan Islamic Jihad commander paruk an thah bakah, an pawl hmun pawimawh eng emaw zat an kap chhe bawk. Mahse beihpui an thlaknaah hian civil mi 10 vel an thi tel nia sawi a ni. Israel lamah pawh firfiak pawl beihna avang hian mi pahnih an thi bawk a ni.
Israel chuan an inbeih chhung hian Gaza aṭangin an ram lamah rocket vawi 1,200 chuang kahchhuah a ni a, rocket ṭhenkhat chuan Tel Aviv leh Jerusalem-te a thleng niin a sawi. Mahse rocket tam zawk hi an lo kahthlak bakah, ram ruakahte a tla tih an sawi bawk. Palestinian pawl rocket kahchhuah ṭhenkhat chu kalsualin Gaza Strip huamchhungah vek a tla a, heng rocket kahsual vang hian Gaza-ah mi pathum an thi a, an zinga pahnih chu naupang an nih thu Palestian human rights group chuan a sawi.