Pakistan PM hlui Imran Khan bail-a chhuah a ni
Pakistan prime minister hlui, eiruk thubuaia man Imran Khan chu bail-a chhuah a ni.
Kar liam ta Thawhlehni khan Khan hi Islamabad High Court compound aṭangin eirua puhna thubuai kaihhnawihah man a ni a, amah thlawptute chuan ram chhung hmun hrang hrangah lungawi lohna lantir zuiin, buaina a chhuak a ni.
Supreme Court-in court compound aṭanga Khan man a nih dan chu dan kalh tia sawiin, chhuah nghal turin a ti. Hemi hnu hian High Court chuan kar hnih chhung bail-a chhuah phalsakin, May 17 thleng chu eng case-ah pawh man theih a ni lo tih a sawi a, Zirtawpni zan khan chhuahin, Inrinni khan Khan hian Lahore-a a chenna in a thleng.
Bail-a dilna phalsak a nih hnua chanchinthar lakhawmtute a kawmnaah Khan chuan, "Ram chhunga pary lian ber hotu chu high court aṭangin ram pum hmuha rukbo leh man a ni," tiin hren a nih chhung hian firfiak ang maia enkawla nih thu a sawi.
Imran Khan hian eiruk thubuai bakah, firfiak zawnga chea puhna te, ram phatsan leh sakhaw sawichhiaa puhna thubuai dangte pawh a nei a, a thubuaiah hian thiam loh chantir a nih chuan a dam chhung politics khel chhunzawm thei loa hrem theih a ni ang.