Germany-ah Ukraine President Zelenskyy a zin Germany-in Ukraine hnenah ralthuam USD tld 3 hu a pe dawn
Ukraine president Volodymyr Zelenskyy chu nimin khan Germany ramah a zin a, Russia-in an ram a run hnuah Germany a tlawhna hmasa ber a ni.
Germany sorkar chuan security thil avangin President Zelenskyy-a kal kualna tur hi kimchangin a puangzar duh lo a ni. Mahse nimin khan German president Frank-Walter Steinmeier leh German Chancellor Olaf Scholz-te nen meeting an neih thu erawh a sawi. Nimin tlai khan khawthlang lama Aachen khua a puang a, hetah hian chawimawina, Charlemagne Prize hlan a ni dawn. He chawimawina lo dawng tawh zingah hian Winton Churchill, Pope Francis leh Bill Clinton-te pawh an tel.
Zelenskyy-a'n an ram a tlawh hma ni, Inrinni liam ta khan Germay chuan Russia nen a indo mek, Ukraine sipaite thuam chakna turin ralthuam, USD tluklehdingawn 3 hu a thawn dawn tih a lo puang a ni. Ralthuam a pek tur zingah hian tank leh anti-aircraft system-te pawh an tel a ni. Defence minister Boris Pistorius chuan Germany chuan Ukraine a thlawpna lantir chhunzawm zel a, a theih anga puih zel a tum tih a sawi.
Ukraine President hian Inrinni khan Italy tlawhin, Italy prime minister Giorgia Meloni, president Sergio Mattarella leh Pope Francis-te a hmu. Rome aṭang hian Germany a pan a, German airforce fighter jet pahnihin an zui a ni.