Cyclone Mocha tleh vangin Myanmar-ah mi 6 an thi

Cyclone Mocha chuan Pathianni tlai khan Bangladeseh leh Myanmar-a Rakhine state a nuai a, Myamnar-ah hian thlipui tlehin chhiatna a thlenah mi paruk an thi a, mi dang 700 vel an hliam bawk.

Thlipui tleh hi Sittwe port city-in a tuar na ber a, in chungte lain, thingkung tam tak an tlu a, ruah a ken tel avangin khawlaiah pawh tui a tling nasa hle. Inbiakpawhna pawh a chhe tel a ni. Cyclone Mocha hi Myanmar-ah hian 209 km/ h-a nain a tleh a ni, Rakhine state aṭang hian nimin khan Chin state leh central region lam a pan a, mahse a tleh nat zawng hi a nep chho tawh nia sawi a ni.

Thlipui tuartu mi sang tel chu monastery, pagoda leh school-ahte sawnchhuah an ni. Sipai sorkar chuan Rakhine state chu national disaster area-ah puang nghalin, thli tlehna bialah hian ei tur, damdawi leh chhawmdawlna dangte a thawn bakah damdawi lam thiamte tirh a tum bawk.

Myanmar-a United Nations Development Programme (UNDP) palai chuan thlipui tlehin chhiatna a thlen hi a nasa hle tih sawiin, an pawl chuan chhiatna tawkte chhawmdawl leh ṭanpui hna theihtawpa an thawh nghal thu a sawi. Aid agency dang leh, Red Cross volunteer sang tel pawhin thlipui tuarte ṭanpui leh chhanchhuah hna hi an thawk bawk a ni.

Bangladesh-ah pawh thlipui tleh leh ruahsur nasa avangin Cox's Bazar-a refugee camp-a mau hmanga chenna in sak 1,300 chuang a chhia. Thlipui a thlen hma hian thuneitute chuan he camp-a awm mi nuai 3 vel chu hmun him lamah an sawnchhuak a ni.