Palestinian President-in Israel hrem turin UN a ngen
Palestinian president Mahmoud Abbas chuan United Nations hnenah, Israel-in Palestinian mite a beihna a tihtawp loh chuan UN member a nihna tihtawp sak turin a ngen.
Abbas chuan UN-in Israel leh Palestinian ram hran dinna tura resolution a lo siam tawh a taka hmang tur leh, Palestinian refugee-te pawh an ram lama an kir theihna tura ruahmanna siam turin a ngen bawk.
UN General Assembly-i a ṭum khatna atana ‘Nakba Day’ pualin Thawhṭanni khan New York-a UN headquarters-ah inkhawm a buatsaih a ni. Nakba Day hi kum 1948 leh a hnua Arab ram pasarih, Palestinian mite leh Israel ram indona avanga Palestinian mi tam tak, himna zawnga tlanchhiate hriatrengna atan hman a ni. Kum 1948-a Israel ram din a nih hnuah khan, Palestinian mi nuai 7.6 chuang chu hnawhchhuah leh tlanchhia an awm tawh nia sawi a ni.
Palestinian President hian darkar khat chhung zet thu sawiin, UN in Palestinian-te chungchangah resolution 1,000 chuang a siam tawh chunga; a engamah tihhlawhtlin a la nih loh chhante a zawt bawk.
Abbas chuan Israel chu UN member a nihna aṭanga tih tura phut leh zawm turte tihlawhtling loah a puh a, Israel chu a ram luaha Palestinian mite chunga inhrosa chhunzawm reng leh, Palestinian refugee kir tur pawh dang zelah a puh a ni. Abbas hian Palestinian-te chuan Juda mite an haw lo a, mahse an ram luahsak an nih chu an duh lo a ni, a ti.
Nakba Day puala hun hman tum hi a hmain Israel chuan a lo sawisel tawh a, UN-a Israel palai Gilad Erdan chuan thil zahthlak tak a ni tiin, member dangte chu he huna tel lo tura ngenna lehkha pawh a lo thawn a ni. Israel foreign ministry-in a tarlan danin, Thawhṭannia hun hmanah hian member ram 32 an tel lo a, an zingah hian US, Canada, Ukraine leh EU hnuaia ram 10 an tel tih a sawi. Israel foreign minister Eli Cohen chuan Nakba chungchang dawt sawi chu an dodal zel dawn a, Palestinian-ten thu dik lo thehdarh a, thil thleng dik tak sawi danglam an tumna chu an remti ngai dawn lo tih a sawi.