Imran Khan-a'n Kum 10 jail tantir tumah Pakistan sipaite a puh

Pakistan prime minister hlui Imran Khan chuan an ram sipaite puhna thar nei lehin, sorkar laka hela puhin kum 10 chhung jail-a tantir tuma ruahmanna siamah a puh.

Pakistan sipaite chu judge, jury leh executioner-te thuneihna chhuhsakah puhin, Imran Khan chuan tuna a hming tihchhiat leh tihzahna atana a nupui, Bushra jail-a tantir a, amah ngei pawh an ram sorkar laka hela puha kum 10 chhung tantir an tum a ni, a ti.

Prime Minister a nihna aṭanga paihthlak a nih hnuah, Imran Khan hian thubuai 100 chuang a nei tawh. A party din, Pakistan Tehreek-e-Insaf (PTI) pawh dan pawna hnawlsak an nih mai theih thu a sawi bawk.

Khan hian Thawhṭanni khan Lahore-a a chenna inah PTI hruaitute chu meeting a neihpui a, meeting zawhah hian a twitter-ah Pakistan sipaite a chunga chet an tum dan hi a tarlang a ni.

Hetih lai hian PTI chuan Imran Khan man a nih chungchangah, Punjab Rangers leh National Accountibility Bureau (NAB) lakah mi rukbo thubuai thehluh an tum tih an sawi. May 9 khan NAB thupek tihchhuah angin, Punjab Rangers chuan PM hlui Khan hi Islamabad High Court-a a thubuai ngaihtuahnaa a kal chu, court compound chhung aṭangin an man a ni. Pakistan Supreme Court chuan court compound aṭanga man a ni hi dan kalh a nih thu lo sawi tawh bawk.