Turkey President thlannaah tling zo an awm lo

Turkey President thar tur thlannaah tling zo an awm lo a, candidate zinga vote hmu sang pahnihten inthlan thawh hnihna an hmachhawn a ngai dawn.

President ṭanglai Recep Tayyip Erdogan chuan vote tla aṭangin 49.51% a hmu a, vote hmu hnem ber ni mah se President tling tura vote tla aṭanga 50% hmuh ngai chu a phak lo a ni. Amah hnaih bertu Kemal Kilicdaroglu chuan 44.88% hmuin, candidate pathumna Sinan Ogan chuan 5.17% a hmu.

Inthlan thawh hnihna hi May 28-ah neih a ni dawn tih Supreme Electoral Board hotu Ahmet Yener chuan a sawi.

Kum 2018-a President thlannaah khan Erdogan hian vote 52.6% hmuin, inthlan thawh hnihna hmachhan ngai loin a tling nghal a ni. Tun ṭumah hian tling nghal lo mah se, inthlan thawh hnihna neihah a tling leh ngei dawn tiin kum 69 mi, Erdogan chuan a sawi a ni. Hetih lai hian Kilicdaroglu pawhin hnehna a chan ngei a beisei thu a sawi ve bawk.