Kum 2022-ah thiam loh chantir mi 883 tihhlum an ni

Amnesty International in a tarlan danin, kum 2022 chhungin khawvel ram 20-ah thiam loh chantir, thi tura an chungthu relsak zinga mi 883 tihhlum an ni a, kum nga chhunga mi tihhlum an tam ber kum niin, kum 2021 aia an tamna hi 53% a tling.

Nikuma mi tihhlum 883 zinga 90% hi Iran, Saudi Arabia leh Egypt rama thleng a ni.

Report-ah hian China ram telh a ni lo thung. China ramah hian kumtin mi eng emaw zat tihhlum an ni ṭhin nia hriat ni mah se, Amnesty chuan tihhlum zat tak hi an hrechiang thei lo tih an sawi.

China bakah North Korea, Vietnam, Syria leh Afghanistan ramah pawh nikum chhung khan mi tihhlum an awm fo a, mahse information mumal tak an hmu thei lo tih an sawi bawk.

Amnesty chuan nikuma mi tihhlum an punna chhanchu Iran leh Saudi Arabia vang a ni tih sawiin, Iran-ah mi 576 tihhlum niin, kum 2021 khan mi 314 tihhlum an ni. Nikuma Iran sorkarin a tihhlum zinga 279 chu tualthah thubuai thiam loh chang niin, mi 255 chu ruihhlo kaihhnawih vang, mi 21 chu pawngsual thubuaia thiam loh chantir an ni a, ram himna tiderthawng zawnga chea puh mi 18 tihhlum an ni tel bawk. Saudia Arabia-ah pawh kum 2021-a mi tihhlum 65 a awm laiin, nikumah 196-ah a pung a, an zinga 85 chu firfiaka chetna kaihnawiha thiam loh chantir niin, ruihhlo tawlha puh mi 57 tihhlum an ni bawk a ni. Nikum March thla khan ni khatah mi 81 zet tihhlum an ni.