Myanmar-a cyclone Mocha tleh vanga thi 81 an tling tawh

Myanmar rama cyclone Mocha tlehin chhiatna a thlena thi chu mi 81 an tling tawh tih official-te chuan an sawi.

Pathianni khan Mocha hian 195 km/hr-a nain Myanmar hi a nuai a, Rakhine state chuan an tuar na ber a ni. Thlipuiin chhiatna a thlena thi zinga 146 hi Rakhine state-a Bu Ma leh Khaung Doke Kar khuaa mite an ni. Rakhine khawpui, Sittwe hmarlama Rathedaung khuaa monastery chimah mi 13 an thi bawk.

Thlipui tleh hian inbiakpawhna lamte a tichhe tel a, hei vang hian chhiatna a thlen dante report kimchang hriat mai theih a ni lo a ni.

Hetih lai hian Arakan Rohingya National Alliance chuan chhiatna thleng vanga thi hi mi 400 chuang an ni a, chin hriat lohin mi tam tak an la awm a, thi zat pawh an la punchhoh a rinawm thu a sawi thung.

Cyclone Mocha hi kum 10 chuang hnua Myanmar rama thlipui tleh na ber niin, chenna in tam tak a len chhiat bakah, thingkungte a chhem tlu nasa hle. Myanmar sipai sorkar chuan Rakhine state chu national disaster area-ah a puang tawh a, thlipui tuarte chhawmdawlna turte pawh thawn a ni. China pawhin harsatna tawkte chhawmdawlna hna thawhnaah a theih anga puih a inhuam thu a sawi.

Kum 2008 khan Myanmar-a Irrawaddy Delta chu cyclone Nargis-in a lo nuai tawh a, ruah nasa tak sur bawkin thlipui tleh leh tuilian vangin mi nuai 1.38 velin nunna an chan a ni.