Pakistan Court-in Imran Khan a humna pawtsei

Pakistan court-in an ram prime minister hlui, Imran Khan-a a thubuai neih hrang hrangah man theih lohah May 15 thleng a humna chu pawtseiin, May 31 thleng man theih a ni dawn rih lo.

Pakistan sorkar aiawhin kum 70 mi, Pakistan Tehreek-e-Insaf (PTI) hotu Imran Khan thubuai siamsak chungchangah information kimchang zawk pe tura hun a dil belh hnuah, Islamabad High Court chuan man theih loha a hum chen hi a pawtsei a ni.

PTI chuan an party hotu laka thubuai a nih dan kimchang an zawt a, ram chhung hmun hrang hrangah Khan hi thubuai 100 chuang siamsak a ni tih an sawi.

Khan hi al-Qadir trust corruption case-a May 9-a man a nih hnuin, kar liam ta Zirtawpni khan Islamabad High Court chuan kar hnih chhung atan bail-in a chhuah­tir a, May 15 thleng a thubuai dangah pawh man theih a ni rih lo tih a sawi a ni.

Hetih lai hian Election Commission of Pakistan (ECP) chuan Imran Khan hi commisison thupek zawm lo a puh a nih chungchangah May 23-a an hmaa inlan turin a ko.

Imran Khan man a nih hnuah PTI member-te chuan ram chhung hmun hrang hrangah lungawi lohna lantirin buaina a chhuak a, sipai hmun pawimawhte beiin an tichhe bawk. Buaina chhuak vang hian mi eng emaw zatin nunna an chan a ni. Pakistan sipai hotu chuan lungawi lohna lantir zinga sipai hmun pawimawh beitute chu man chhuah a, Pakistan Army Act leh Official Secret Act hnuaiah an chungthu ngaihtuahsak an ni dawn tih a sawi, heng dan hnuaiah hian thiam loh chantirte chu tihhlum emaw, damchhung tang tura hremna emaw pek theih an ni ang.

Khan-a thlawptute hian Rawalpindi-a Army head­quarters an luhkhung a, Lahore-a Coprs Commander House an hal bawk a ni.