China-in 'fake news' thehdarhtu online account nuai 1 chuang titawp
China chuan thu dik lo thehdarha puhin, April 6 aṭang khan thla khat chhungin online account 1,07,000 a titawp. Hemi chhung vek hian internet-a fake news tihchhuah 8,35,000 a paih bawk.
Internet kaltlanga thu dik tawk lo leh zeldin thu thehdarh ṭhin tihtawp tumin Cyberspace Administration of China (CAC) chuan special campaign a nei mek a ni. Thu dik leh rintlak tak chauh tihchhuah a nih a, internet hmangtute dikna chanvote venhimsak zel a nih theihna turin CAC chuan hma a la zel dawn tih an sawi. Tun hnaia sumdawng leh entrepreneur-te hmingchhiat theihna leh an dinhmun tichhe thei zawnga online lama comment awm ṭhin chu dap chhuah zel an tum thu an lo sawi tawh bawk.
China chauh lo, ram dangte pawhin online kaltlanga thu dik tawk lo thehdarh ṭhin ven leh tihtawp tum hian hma an la chho mek a, ram ṭhenkhat chuan fake news thehdarhtute hremna dante pawh an siam tawh a ni.