Lebanon : Chhiatna thlenga thi mi 137 an tling tawh Port official-te house arrest-in hrêng

Lebanon khawpui, Beirut-a lawng chawlhna hmuna thil puakin chhiatna nasa tak a thlena thi chu nimin khan mi 137 an tling tawh a, chin hriat lohin mi eng emaw zat an la awm. Hliam tuar mi 5,000 chuang an awm bawk. 

Chhiatna rapthlak tak thlen dan hi chhui zui  nghal a ni a,warehouse-a thil puak thei hlauhawm tak awmte chu a himna lam ngaihtuah a ni tawk lo nia sawiin, sorkar chuan port official eng emaw zat chu nimin aṭang khan pawn chhuak thei loin, house arrest-a hren nghal an ni. 

Beirut-a lawng chawlhna hmuna thil puak hian chhiatna a thlen nasa hle.  Thil puahna hmun hi lawng chawlhna hmuna warehouse, ammonium nitrate dahkhawmna hmun a ni. He hmunah hian kum ruk chhung him taka dah an lo ni tawh a, Thawhlehni zana a puahna chhan hi hriat a ni lo. Chhanchhuah hna thawh chhunzawm zel a ni a, thuneitute chuan in chim hnuaia tangte chhanchhuah belh zel an ni tih sawiin, he chhiatna thleng vanga thi leh hliam pawh hi an la pun chhoh ngei a rinawm thu an sawi.

Thil tihchhiat dollar tld 10-15 hu a tling 

Beirut Governor Marwan Abboud chuan thil puakin Beirut khawpui chhunga thil a tihchhiat chu US dollar tluklehdingawn 10-15 inkar vel a tling tih a sawi. Lawng chawlhna hmuna thil puak hian Beirut khawpui zahve vel a nghawng pha nia sawi a ni. He chhiatna thleng vang hian mi nuai thum chuang chu chenna nei loin an awm phah niin Governor chuan a sawi bawk. 

Lebanon mipui tam tak chu Beirut-a mihring chenna hmun aṭanga hnai te, lawng chawlh hmunah puak thei thil hlauhawm tak ton 2,750 zet dah a nih chungchangah an lungawi lo hle. 

Heng puak thei thilte hi lawng chawlhna hmuna warehouse-a kum ruk chhung dah a lo nih theih dan leh, eng vanga he hmuna dah nge a ni tihte sawifiah turin sorkar an phut. Lawng chawlh hmun enkawl hna hi sem zai a ni a, port authority chuan a enkawl hna hi thawk mah se, an hnate hi public works leh transport ministry lamin an enpui ve leh a ni.  He lawng chawlhna hmun kaltlanga ram dang aṭanga bungraw lut leh an thawnchhuahte chu customs agency lamin an enkawl a, port-ah hian security agency-ten base an nei vek bawk.  

Nimin zing khan France President Emmanuel Macron chuan Lebanon a pan a, Beirut-a chhiatna  thlen hnua ram dang hruaitu zinga tlawh hmasa ber a ni. Macron hian Lebanon president Michel Aoun leh prime minister Hassan Diab te a hmu dawn a, Lebanon-in puih a ngaihnate a sawipui ang.

Iraq chuan Beirut-a chhiatna rapthlak tak a thlen hnuah, Lebanon tan oil a pe dawn tih a sawi. Baghdad aṭangin oil tanker-te hian Beiruk an pan dawn a, Syria ram an paltlang dawn a ni. Iran oil minister Ihsan Sabudl Jabbar Ismail chu nimin khan Beirut a thleng tawh a ni.

Australia prime minister Scott Morrison chuan Lebanon-a chhiatna rapthlak tak thleng tuarte chhawmdawlna atan Australian dollar maktduai hnih (USD mtd 1.4) an pe dawn tih a sawi. Morrison chuan ṭanpuina sum hi World Food Program leh Red Cross kaltlangin pek a ni dawn tih a sawi a ni. 

Russia chuan nimin khan thlawhtheihna pathum hmangin Lebanon pui turin medical team a tirh belh. A hmain emergency worker leh medical personnel 50 bakah mobile hospital siamna turte a lo thawn lut tawh bawk.