Myanmar sipai sorkarin ralthuam USD tld 1 hu a lalut tawh
Myanmar sipai sorkar chuan kum 2021, February thlaa civil sorkar paihthla a, thuneihna an chan hnuah ram dang aṭangin ralthuam, USD tld 1 hu a lalut tawh niin United Nations expert chuan a sawi.
UN Special Rapporteur on Human Rights in Myanmar, Tom Andrews-a'n Nilainia report a tihchhuahah, Myanmar sipaite ralthuam lakluh tam zawk hi Russia, China leh Singapore-a mite an nih thu a tarlang.
"Heng ralthuam leh a siamna hmanruate hi Myanmar-a sipaiten thuneihna an chan hnuah chawl loin an lalut reng a ni," tiin an ralthuam lakluhte hi direct-in sipaite hnenah leh, sipai aiawh ralthuam zuartute kuta pek an nih thu a sawi bawk.
Andrews hian a report-ah hian thla liam taa Sagaign biala Paazigyi khua sipaiten an beih chungchang pawh tarlangin, Russia siam Yak-130 fighter jet hmangin sipaite chuan NUG office thar hawnna inkhawm neih laiin bomb kg 250-a rit an thlak tih a sawi. Bomb thlak vang hian mi tam takin nunna chanin, thil a tichhe nasa hle a, dam khawchhuakte pawh Mi035 attack helicopter hmangin an kap zui leh bawk a ni, a ti. He khuaa sipaite beihpui thlaknaah hian mi 160 vel an thi a, an zinga mi 59 chiah chu tute nge an ni tih hriat theihin a awm a ni. Paazigyi khuaa sipaite chet dan hian an ram mite chung ngeia sipaite rawng taka an chetdan a rawn tilang a ni, tiin report chuan a tarlang.
Report-a a landanin, Myanmar sipaiten ralthuam an lakluh zinga USD mtd 406 hi Russia company-te hnen aṭanga an lei niin, China aṭangin USD mtd 254 leh Singapore aṭangin USD mtd 254 hu an lalut bawk. Hei bakah hian India aṭangin USD mtd 51 leh Thailand aṭangin USD mtd 28 man thawn a ni bawk a ni.
UN expert report chungchanga hi Russia leh China chhangin, rapporteur chu a tihtur bak tiah an puh a, dan phalna hmanga ralthuam inleitir chungchang chu a dik lo zawnga thu vaivirah an puh. India pawhin ralthuam leina tur contract hi sorkar hmasa nena an lo tihfel tawh niin a sawi bawk.