Imran Khan-a'n a chenna in police-ten an hual niin a sawi

Pakistan prime minister hlui, Imran Khan chuan police-ten man tumin Lahore-a a chenna in chu an hual vek niin a sawi.

Imran Khan hian Nilaini khan video link kaltlangin a chenna in, Zaman Park aṭangin a party, Pakistan Tehreek-e-Insaf (PTI) worker-te hnenah thuchah a sawi. Thu a sawi hma hian sorkarin a chenna inah police-te tirin, man a nih thuai a rin thu a twitter-ah a tarlang.

PM hlui chuan kar liam taa Islamabad High Court compound aṭanga man a nih hnuah, ram chhung hmun hrang hrangah buaina chhuak leh, sipai leh sorkar hmun pawimawhte beih chungchang chu sorkar lam ni lo, midangin an chhui chian a phut thu a sawi bawk.

Khan chuan sorkar chu an party leh sipai inkarah boruak ṭha lo siam a tum a ni tiin, sipaite a sawiselna ṭhin pawh a fate siamṭhatna tura a sawisel ṭhin ang bawka an insiamṭhatna tura ti ṭhin a nih thu a sawi. Ram dang mithmuhah chuan Pakistan Army chu a chhan tlat tih a sawi a, amah anga sipaite thlavang hauh ngam hi a rin loh thu a sawi bawk a ni.

Imran Khan chenna hi panna kawngpuite hi police-ten an dang vek a, Punjab caretaker information minister Amir Mir chuan a hmain Khan chenna inah hian firfiak 30-40 vel an biru a ni tiin, heng mite hi an kuta hlan turin a lo hriattir tawh a ni. Thuneitute kuta a hlan duh loh chuan, enforcement agency chuan a chenna inah luhchilha man theihna dan an nei tih a sawi.