Kim Jong-Un kaihhruaina hnuaiah committee nei

North Korea-a rorellai, Workers' Party of Korea (WPK) chuan Nilaini khan Central Committee an nei a, he meeting hi an ram hotupa Kim Jong Un chuan a kaihruai a, an party hmasawn dan turte an sawi ho. 

Central Committee-a depart­ment dah thar chungchangte sawi ho a ni a, an party-a personnel affairs system lamte pawh tun aia an hmasawn theih nan meeting-ah hian sawi ho a ni bawk tih an ram chanchinthar puangtu Korean Central News Agency (KCNA) chuan a tarlang. Meeting-a an thurel kimchang erawh KCNA chuan a tarlang lo.

Meeting-ah hian Kim Jong Un chuan Executive Policy Council chu field-a an hnathawhah tum mumal nei turin leh tun aia hmasawn thei tura thawk turin a fuih. He meeting-ah hian an rama Kaesong City-a Covid-19 hri kai pakhat hmuhchhuah thar chungchang pawh sawi lan a ni a, hmalak dan turte pawh an rel zui bawk. 

July thla tawp khan South Korea leh North Korea ramri bula khaw awm Kaesong khuaa ramri daidanna kulh bangah mi pakhat a lut ru niin KCNA chuan a tarlang a, hemi hian Covid-19 a kai tih finfiah a nih hnuah Kim Jong Un chuan emergency meeting a ko nghal a, July 25 vek khan Kim chuan ram pumah emergency puangin, hri kai hmuhna Kaesong khuaah lockdown a puang nghal bawk. Hri kai hi midang hmuh belh an la awm lo niin KNCA chuan a tarlang.