Khawvel pumah Covid-19 vanga thi 6,96,147 an awm tawh : World Health Organization

World Health Orga­nization (WHO) chuan nimin thleng khan khawvel hmun hrang hrangah Covid-19 vanga thi mi 6,96,147 an awm tawh thu a tarlang. Khawvel pum huapa Covid-19 hmuh chhuah tawh zat chu 1,83,54,342 a ni tawh a, nimin khan hmuh chhuah thar mi  2,06,709 an awm leh bawk a ni.

America region-ah khuan hripui kai mi 98,41,842 an awm tawh a, Europe-ah chuan hri kai 34,51,556 an awm tawh bawk a ni. South-East Asia-ah 22,99,433 awm tawhin, Eastern Mediterranean-ah 15,85,458 an awm tawh bawk a, Africa-ah chuan case 8,34,147 an awm tawh laiin Western Pacific-ah chuan 3,41,165 an awm tawh thung. 

1    America    9,841,842

2    Europe    3,451,556

3    South-East Asia    2,299,433

4    Eastern Mediterranean    1,585,458

5    Africa    834,147

6    Western Pacific    341,165

Khawvela Covid-19 kai tam ber ram US-ah chuan hri kai mi 46,78,610 awm tawhin mi 1,54,952 laiin an thihpui tawh. August 5 khan mi sing nga dawnin hri an kai tih hmuh chhuah leh a ni a, mahse US-ah hri kai hmuh chhuah thar zat hi tun karah hian a tla hniam ve hret hret thung. 

July thla laihawl leh July thla tawp lamah kha chuan ni khata hri kai hmuh chhuah thar sing sarih chuangte an awm a, mahse tlem tlemin ziaawm lam an pan ve zel niin a lang. 

Report hrang hrang inang lo ṭhin mah se he thu ziah laia WHO report tarlan dan chuan Brazil-ah chuan mi 94,665 lai hripui vangin an thi tawh a, hri kai 27,50,318 an awm tawh bawk. Case thar 16,641 a awm leh bawk a ni.