Queen Elizabeth II vuina senso USD mtd 200 dawn a tling

Britain sorkarin nikum Septem­ber 19-a Queen Elizabeth II vuina atana a sum sen chu pound mtd 162 (USD mtd 200 dawn) a nih thu treasury chuan a sawi.

Queen Elizabeth II hi ram chawimawina famkim nena vuiliam a ni a, kum 1965-a prime minister hlui Winston Churchill vuina dawta UK-in state funeral a buatsaih lehna hmasa ber a ni.

Kum 70 chhung zet Britain lal a nih hnuin, nikum September 8 khan kum 96 mi niin Queen hi a thi a, vui a nih hmain ram pumah ni 10 chhung sun a ni phawt a ni. September 19 khan London-a Westminter Abbey-ah vui a ni a, a vuinaah hian ram hrang hrang aṭangin hruaitu leh lal chhungkaw mi leh sa eng emaw zat an tel.

Ningani khan Parliament-ah Queen vuina senso zat hi ziakin hriattir a ni a, department hrang hrangte sum hman dan tarlan a ni. Queen vuina atana inbuatsaihna kawngah Home Office chu sum hmang tam ber niin euro mtd 74 a hmang a, department of culture, media and sport chuan euro mtd 57 a hmang bawk. Department of transport-in euro mtd 2.565; foreign, commonwealth and development office-in euro mtd 2.096 leh ministry of defence-in euro mtd 2.890 an seng a, Northern Ireland office-in euro mtd 2.134, Scotland sorkarin euro mtd 18.756 leh Wales sorkarin euro mtd 2.202 an seng bawk.

Treasury chief secretary John Glen chuan Treasury lam hian sum pek belh a ṭulnaah a theih angin a lo pui zel a, Scotland, Wales leh Northern Ireland sorkar-te sum sen zat chu a vaia rulh leh vek an ni tawh bawk a ni, a ti.