Hiroshima-a bomb thlak kum 75-na champha hmang
Hisorshima, Japan-a US in bomb a thlakna champha vawi 75-na chu nimin khan hman a ni a, mahse he hun hi Covid-19 vangin kum dang angin hman theih a ni lo.
Kum 1945, August 6-a US-in Hiroshima khuaa atom bomb, 'Little Boy' an tih a thlak hriatrengna puala inkhawm buatsaih hi Peace Park-ah neih a ni. Inkhawm hi bomb thlak a nih hun, an ram huna zing dar 8:15 ah neih a ni.
Mahse hripui leng avangin mipui an pungkhawm tam thei lo a, kalkhawmte hian thawmhnaw dum hain, hmai tuamna an hmang vek bawk. Inkhawmah hian remna leh muanna puala ṭawngṭai, zai leh paper crane (lehkhaa thilsiam) te entir a ni.
Hiroshima khuaa bomb thlakah hian mi 1,40,000 vel an thi a, a hnuah bomb puak vanga inhliam leh natna nei mi 1,000 chuang an thi leh bawk. Kum 1945 August 6 zing dar 8:15 khan US chuan a thlawhtheihna, Boeing B29 bomber Elona Gay an tih hmangin Japan-a Hiroshima khuaah nuclear ralthuam hmanga siam atom bomb, Little Boy chu a thlak a ni. Hemi aṭanga ni thumna August 9 khan zing dar 11:00-ah khan Nagasaki khuaah atom bomb tho, 'Fat Man' tih chu US chuan a thlak leh a, he khuaah hian mi 70,000 vel an thi a ni. US-in Japan-a bomb a thlak hnu September 2, 1945 khan Indopui pahnihna chu a tawp zui ta bawk.
US chuan a thiltih vang hian Japan hnenah vawikhatmah ngaihdam a la dil lo. Kum 2016 khan US president hlui Barack Obama chuan Hiroshima khua a tlawh a, US President zinga Hiroshima tlawh hmasa ber a ni. Pope Francis pawhin nikum khan bomb thlakna hmun Hiroshima leh Nagasaki hi a tlawh a, US thil tih chu vanthlang hmaa sawi ngam loh khawpa rapthlak a nih thu a sawi hial.
Japan rama US-in bomb a thlak chhan hi kum 1941, December 7-a US, Hawaii huamchhunga Honolulu-a 'Pearl Harbor' hmun, Imperial Japanese Navy Air Service-ten indo thlawhtheihna leh bomber hmangin an beih vang a ni.
He inbeihna thlen vang hian US chu Indopui II-naa tel phahin kum 1945, August thla khan Japan chu atomic bomb hmangin a bei a, Japan a tlawm phah ta a ni.