England lalnu a inkhungranna kulh Kum 40 hnuah vantlang tan hawng dawn

Britain lalnu Queen Elizabeth chenna hmun pakhat Windsor Castle-a East Terrace Garden chu kum 40 lai vantlang kal phal loh a nih hnuah vantlang tlawh theih turin hawn a ni leh dawn.

Windsor Castle hi hripui len vanga Britain lalnu thla eng emaw zat a inkhunghranna hmun kha a ni nghe nghe a, he hmuna huan awm chu August leh September thla chhung hian kar tawpah vantlang tan a tlawh theih ṭhin dawn a ni.

Windsor Castle Learning Curator Richard Williams chuan helai hmuna pangpar huan hmasa ber chu George IV hunlai, kum 1824 khan siam a nih thu a sawi. He kulh bang humhim tur hian Charles II khan kum zabi 17-na lai khan  terrace a siam tih a sawi bawk.

Kum zabi 19 lai khan  Queen Victoria leh Prince Albert-te chuan East Terrace Garden hi an chaweibawl ṭha leh a, tuna a landan erawh hi chu kum 1971 vel aṭanga Prince Philip-a'n a khawih danglam leh a ni thung.

Williams chuan Indopui II-na lai khan helai huan hi thlai chinna atan laih khuar vek a nih tih a sawi bawk. Windsor Castle hi kum zabi 11-na hunlai William the Conqueror  din a ni.