Israel Minister-in Al-Aqsa compound a tlawh
Israel far-right national security minister Itamar Ben-Gvir chuan Pathianni zing khan East Jerusalem-a Al-Aqsa Mosque compound a tlawh a, Israel chu he hmun enkawltu a nih thu a sawi. A thusawi hi Palestinian lamin na takin an sawisel zui nghal a ni.
Al-Asqa mosque compound-ah hian Juda-te sakhaw hmun pawimawh a awm ve bawk a, anni chuan Temple Mount tiin an sawi a, Muslim-ten Al-Harm al-Sharif tiin an sawi thung. He hmunah hian thuneitu nih inchuhin Israel-Palestian-te inkarah buaina a chhuak fo a, inremna an siamah chuan Muslim ni lote chu he hmun hi an tlawh phalsak ni mah se an ṭawngṭai erawh phalsak an ni lo. Mahse Juda-te chuan he khapna hi pawisa loin, ṭawngṭaina hun an hmang fo a ni.
Ben-Gvir chuan Israel mipuite tana hmun pawimawh, Temple Mount a tlawh chu lawmawm a tih thu sawiin, Hamas-te vauna chu engmah a ni lo a, Jerusalem leh Israel ram pum chunga thuneihna chu an kutah a awm tih a sawi.
Palestinian president Mahmoud Abbas-a thupuangtu chuan zing karah rukru ang maia al-Aqsa mosue compound-a Ben-Gvir kal chuan, he hmuna thuneitu zawk chungchangah thil dik tak chu engmah a tihdanglam phah dawn lo tih a sawi. Hamas thupuangtu pawhin Ben-Gvir thiltih chuan Israel-in a nghawng a tuar ngei dawn a ni, tiin a vau zui bawk.
Israel sipaiten Nablus an beihnaah Palestinian 3 that
Israel sipaite chuan West Bank hmarlama Nablus khuaa Balata refugee camp an beihnaah Palestinian mi pathum an that.
Palestinian health ministry chuan Israel sipaite beihpui thlaknaah hian mi pathum an thih bakah, mi pali dang kahhlum an ni a, mi 10 chuang chu tear gas an hipluh nasat avangin enkawl ngaiin an bawk niin a sawi.
Israel sipai leh special force-te chuan Pathianni zan aṭang khan beihpui hi thlakin, nimin zing thleng khan an la bei chhunzawm a ni. Refugee camp luhnate chu bulldozer hmangin an tichhia a, in ṭhenkhat pawh an tichhe tel bawk. Sipaite hian anti-tank grenade te pawh an hmang tel niin Palestinian lam chuan an sawi a ni.
Hetih lai hian Israel sipaite chuan Palestinian mi pathum an man bakah, an ralthuam kawlte pawh an man tih an sawi. Thi an awm leh awm loh chungchang erawh an sawilang lo a, camp chhungah hian apartment pakhatah bomb lam chi siamna laboratory hmuhchhuah a nih thu an sawi. Sipaite hian nimin vek khan Nablus hmarlama Jenin refugee camp an dap bawk.