India mi hausa hnen aṭanga UK rorellai party sum dawn sawisel

Britain-a eptu party, Labour Party chuan India ram sumdawng hausain rorellai, Conservative Party tana donation a pek chu hman theih loha dah an duh tih an sawi.

Rice brand lar tak Amira hotu, Karan Chanana hi a sumdawnna kawnga thil dik tawk lo tia puh Enforcement Directorate (ED)-in an chhui lai mek a ni. Kum 2019 aṭang khan Britain-a a company, Amrica G. Foods kaltlangin Conservative Party tan hian GBP 2,20,000 vel a pe tawh a ni.

Labour MP leh All Party Parliamentary Group (APPG) on Anti-Corruption and Respon­sible Tax chair, Margaret Hodge chuan rorellai party chuan fund an hmuh dante hi chhui chiang a, an chhui zawh hma chu an sum pekte hi hman theih loha dah rih turin an phut. Tories party chu an sum hmuh chungchangah donor liante kuta innghat nasa lutuk leh, chhui pawh chhui ṭha tawk lohah an puh.