Pakistan anti-terrosim court-in Imran Khan bail dilna phalsak

Pakistan khawpui, Islamabad-a anti-terrorism court chuan prime minister hlui Imran Khan-a bail dilna chu nimin khan a phalsak.

Pakistan Tehreek-e-Insaf (PTI) party hotu, Imran Khan hi kumin March 18-a court complex-a buaina chhuak kaihhnawiha thubuai pariat siamsakah, June 8 thleng bail-a chhuah phalsak a ni. Bail dilna ngaihtuahnaa inlan turin, Khan hian Lahore aṭangin Islamabad hi a pan a ni. March 18 khan Toshakhana corruption case-ah Khan hi court-ah a inlan a, hemi ṭum hian court compound-ah PTI worker leh police-te nasa takin an intibuai a ni. He buaina chhuakah hian security mi 25 chuangin hliam an tuar.

National Accountability Bureau (NAB) court chuan Khan-a nupui, Bushra Bibi pawh eiruk thubuaiah May 31 thleng bail a phalsak bawk. Nimin tlaiah vek khan Imran Khan hi al-Qadir trust case-ah NAB court-ah hian inlan tura koh a ni bawk.

Nikum April 15-a prime minister a nihna aṭanga paihthlak a nih hnuah, Imran Khan hi thubuai 150 dawn siamsak a ni tawh. Khan hian paihthlak a nih hnuah, prime minister Shehbaz Sharif kaihhruai sorkar chu beiin, an ram chhung hmun hrang hrangah campaign a nei a, paihthlak a nih dan chu dan kalh nia sawiin, an ram inthlanpui neih thuai a phut a ni.