Brazil-ah bird flu leng vangin emergency puang
Brazil ramah bird flu, H5N1 virus leng vangin thla ruk chhung atan animal health emergency an puang.
Emergency puan a nih tak vangin, sorkar pawhin H5N1 virus darh zel tur venna atan ruahmanna leh khuahkhirhnate a siam thei dawn a ni.
Brazil hi khawvela arsa thawnchhuak tam ber ram niin, kum khata a thawnchhuah hi USD tld 10 hu a tling pha.
Thuneitute chuan bird flu an hmuhna tam ber hi an ram chhim lam niin an sawi a, mahse hmun danga a darh zel tur venthawn thilah ram pumah emergency hi puan a nih thu an sawi.
Kum 2021, October aṭangin ram hrang hrangah bird flu hi a leng a, hmun ṭhenkhatah chuan sava lam chi chauh ni lo, ransate zingah pawh he hri kai hi hmuh an ni. Scientist-te chuan he hri a rawn darhna chhan hi an la hrechiang lo tih an sawi.
World Health Organisation (WHO) chuan H5N1 virus hi uluk taka zirchian leh thlithlai reng a ni dawn tih sawi a. He hri insiam danglam zel hi mihringah a darh thei em tihte pawh an zir dawn tih a tarlang bawk a ni.