Thailand Move Forward Party-in Party 7 thawhpui dawn

Thailand ram inthlanpui neih zawh taka party mala chak ber, Move Forward Party chuan ṭangrual sorkar siam thei turin party dang pasarihte inremna a ziahpui.

Thawhṭanni khan party 9-te hian point 23 awmna inremna an ziak a ni. Inremna an siamah hian ṭangrual sorkar an siam thei a nih chuan an hmalak tumna hrang hrangte tarlangin, heng zingah hian constitution thar draft te, monopoly tihtawp, anpui inneih phalsak tihte a tel. Hetih lai hian inremna an siamah hian sawisel hlawh tak, an ram lal sawisel leh sawi chhiat khapna dan khauh tak awm siamṭhat tumna erawh an sawilang tel lo.

May 14-a inthlanpui neihah khan Pita Limja­roenrat kaihhruai Move Forward Party hian Parliament seat 500 awmah seat 152 a la a ni. Mahse party malin sorkarna an siam pha lo a, hei vang hian kum kua zet sipai kaihhruai sorkar rorelna titawp turin party dangte a thawhpui dawn a ni. Party pariat thawkho turte hian Parliament lower house-ah hian seat 313 an nei pha ang. Pita chuan party pariatten thawhhona tur inremna an siam thei chu an ram tana thil chhinchhiahtlak a ni thu sawiin, boruak ṭha tak hnuaiah an ramah democracy sorkar an din thei dawn niin a sawi.

Mahse sipai sorkar hnuaia ram danpui an siamah, Parliament lower house-a majority nei hian thuneihna an chang nghal ngawt thei lo thung. Senate leh lower house chuan an ram prime minister thar tur hi an thlan a ngai dawn a, Senate-a member 250-te hi sipai sorkar ruat vek an nih avangin, lower house-a chak zawk pawhin Senate member thlawpna hi an mamawh dawn a ni.

Prime Minister atan tling tur hian vote 376 an hmuh tlin a ngai dawn a ni. Senator eng emaw zat chuan Pita chu PM atan an thlawp dawn lo tih an sawi lawk.