Dead Sea bula ram ngaw a kang

Israel-ah Dead Sea hmarlama ramngaw chu nasa takin a kang a, Israel kangṭheltu pawl tam takin ram kang ṭhelh hna hi an thawk mek.

Ram kang hi hal luih nia hriat a ni a, Thawhṭanni khan a kang ṭan a, nimin thleng khan ṭhelh mih a la ni lo.

West Bank district-a Fire and Rescue Services commander, Shiko Bar Dov chuan West Bank, Central, South leh Dan district aṭangin kangṭhelhtu pawlte bakah, volunteer-te nen ram kang hi an ṭhelh mek tih a sawi.

Ram kang vang hian Highway 90 chu Thawhṭanni khan khar lailawk a ni a, mahse nimin lamah erawh an hawng leh nghal a ni.

Bar Dov khua hi a lum leh a ro em avangin, Israel mipuite chu fimkhur turin a chah a, ramah thil hal mai lo tur te, kangmei tichhuak thei welding leh thil dang an thawhna kawngah pawh fimkhur turin a chah.

Pathianni zan khan Kibbutz Kalia-a date palm hmun zau tak a lo kang tawh bawk a, Thawhṭanni tlai lam khan an ṭhelh mit thei chauh a ni.