Myanmar leh Bangladesh-a thlipui tuarte tan USD mtd 375 mamawh
United Nations chuan tun hnaia Myanmar leh Bangladesh ramah cyclone Mocha tuartute chhawmdawlna atan USD maktaduai 375 mamawh a nih thu a sawi.
May 14 khan cyclone Mocha hian Myanmar khawthlang lam bial leh, Bangladesh hmun ṭhenkhat a nuai a, thil tam tak tichhiain, nunna chan pawh eng emaw zat an awm.
UN chuan Myanmar rama thlipui tuarte chhawmdawlna tur, ei tur, damdawi leh an mamawh dang pekna turin fund USD mtd 211 bakah, USD mtd 122 dang mamawh belh a ni tih a sawi a, Bangladesh tan USD mtd 42 mamawh a ni bawk a ni, a ti.
Myanmar ram hian thlipui tleh hi a tuar na zawk a, hetih lai hian thlipui tuarte chhawmdawlna hna thawh tur pawlte chuan sipai sorkar phalna an la nghak mek a ni. Chhawmdawl hna thawktu ṭhenkhat chuan thlipui tlehin chhiatna nasa tak a thlen aṭanga kar khat hnuah pawh sipai hotute hnen aṭangin phalna hi an la nghak mek tih a sawi a, phalna an hmuh chuan harsatna tawkte chhawmdawlna turte hi thawnin, ṭanpui hna pawh chak zawka an kalpui theih tur thu a sawi.
Myanmar sipai sorkar chuan thlipui tlehin chhiatna a thlenah mi 145 an thi niin a sawi a, thlipui tlehna bialah hian chhawmdawlna pawh thawn a ni tih a sawi bawk.
UN-in Myanmar tana sum mamawh a sawi hi Chin, Sagaing, Magway, Kachin, leh Rakhine biala thlipui tuarte chhawmdawlna turin a ti. Bangladesh-ah chuan thlipui tleh hian Coxs' Bazar-a Rohingya refugee camp-a chenna in eng emaw zat a lenchhia a, mahse thlipui tleh vanga nunna chan an awm thu erawh report a awm lo thung.