Khawvela ram hrehawm ber Zimbabwe

Economist lar, John Hopkins University-a Applied Economics professor, Steve Hanke-a'n ram economy din­hmun a zirchianna aṭanga, Annual Misery Index (HAMI) a tihchhuahah, Zimbabwe chu khawvela ram hrehawm ber, 'Most miserable country'-ah thlan a ni.

Hanke 2022 Annual Misery Index-ah hian indo thlen mekna, Ukraine, Syria leh Sudan ram aiin Zimbabwe ram hi hrehawm zawk leh, thil man pawh a san nasatnaah tarlan a ni a, nikum aia thil man a sanna hi 243.8% a tling. Ranking pekna atan hian ram 157-te economy dinhmun zirchian a ni. Hanke chuan Zimbabwe ram dinhmun chhiat leh hrehawmna chhanah hian rorellai, ZANU-PF leh an policy chu a puh.

Ram hrehawm zual 15 thlan zingah hian Venezuela, Syria, Lebanon, Sudan, Argentina, Yemen, Ukraine, Cuba, Turkey, Sri Lanka, Haiti, Angola, Tonga, leh Ghana ramte an lang bawk.

Ram 157 zirchian zingah Switzerland ram dinhmun chu ṭhain, a ram mipuite pawh an hlim ber a, a chhan pakhat chu debt-to-GDP ratio a hniam vang niin Hanke chuan a sawi.

US chu 134-naah a awm a, an rama hnathawh nei lo, un­employment chu an ram dinhmun ṭhat loh chhan pakhat nia sawi a ni a, World Happiness Report-ah kum ruk chhung a zawna 'happiest country'-a lo thlan tawh, Finland chu misery index-ah hian 109-na a ni.