PTI hruaitu Shah Mahmood Qureshi man nawn leh
Pakistan prime minister hlui, Imran Khan-a party, Pakistan Tehreek-e-Insaf (PTI) vice chairman Shah Mahmood Qureshi chu Thawhlehni khan Rawalpindi-a Adiala Jail aṭanga chhuah a nih hnu lawkah man nawn leh nghal a ni.
PTI hruaitu dang Mussarat Jamshed Cheema pawh man nawn leh a ni bawk.
Qureshi hi Adiala Jail aṭanga chhuah a nih hnu reiloteah police-ten an hruai leh nghal a, an hruaina hmun hi an puangzar lo. Man nawn a nih hma lawka chanchinthar lakhawmtute a kawmnaah, Quershi chuan PTI a ni a, a ni reng bawk dawn tih a sawi.
Hetih lai hian PTI senior vice president Shireen Mazari chuan PTI a chhuahsan thu leh, politics a chawlhsan thu Thawhlehni khan a puang.
Qureshi hi May 9-a al-Qadir trust case-a prime minister hlui Imran Khan man a nih ṭuma buaina chhuak kaihhnawihah PTI hruaitu man zingah a tel a. Buaina chawk chhuak zawng leh, party worker-te fuih zawnga a chet tawh loh tur thu a sawi hnuah, Thawhlehni khan Islamabad High Court chuan jail aṭanga chhuahtirna tur thupek a tichhuak a, mahse chhuah a nih hnu lawkah police-te chuan Punjab leh Khyber Pakhtunkhwa-a PTI worker-ten buaina an siam kaihhnawihnah an man zui leh nghal a ni.