United Nations chuan Myanmar sipai sorkar hnenah cyclone Mocha tuartute ṭanpui an nih theihna atan, chhawmdawl hna thawktute tan kawng hawnsak turin a ngen. 
UN rights chief Volker Turk chuan thlipui tuar, ṭanpui leh chhawmdawl ngai tam tam an awma, heng mite mamawh pek leh thawn hi sipai sorkar chuan a phalsak thuai a ngai a ni, a ti. 
May 14-a cylcone Mocha tleh khan Myanmar leh Bangladesh-ah chenna in tam tak a lenchhia a, Myanmar-ah chuan thlipui tlehin chhiatna a thlenah thi eng emaw zat an awm bawk. Sipai sorkar chuan thi zat hi 148 an tling tih sawiin, a tam zawk chu an ram khawthlang lam Rakhine state-a Rohingya mite an ni. 
Geneve-a press conference a neihah Turk chuan thlipuiin chhiatna a thlen theih dan turte chu lo thlirlawk leh inven theih tur a ni, a ti. Hetianga chhiatna nasa tak an tuar hi mihring dikna chanvo ngaihthah sak nen pawh inzawmna a nei tiin, kum tam tak chhung Myanmar ram thuneitute chu Rohingya-te dikna leh zalenna chu an lo rahbehsak tawh a ni, a ti. 
Rakhine state hi Rohingya muslim tam berte chenna niin, a tam zawk chu camp-ah an khawsa a, tam tak chu mau hmanga insakahte an la khawsa mek a ni. Myanmar sipaite hnenah pawh vawi tam tak a chenna hi tuilian laka himna hmunah sawnsak tura an ngen tawh thu leh, an ngenna hi hnawlsak zel an la nih thu Turk chuan a sawi bawk. 
Turk chuan, "Myanmar ram vawi tam tak ka tlawh tawh aṭangin an dinhmun hi ka hrechiang tawh a ni. Thuneitute chuan Rohingya-te chu an duhdan anga awm thei loin an dang tlat ṭhin a, cylcone tleh hma pawh khan an duh angin an awm thei lo a ni," tiin a sawi.