Vietnam noodle vendor, Bui Tuan Lam chu sorkar official pakhat nuihsawhna video a post avangin nimin khan kum nga leh a chanve tang tura hrem a ni. 
Vietnam-ah hian rorellai, Vietnamese Communist Party leh sorkar sawiseltu eng emaw zat chu hrem an lo ni tawh. 
Kum 2021, November thla khan London restaurant-a Vietnam official pakhatin Turkish chef Nusret Gokce siam, bawngsa rangkachaka luan a ei lai video chu a darh a. Hemi hnu lawkah Lam hian official nuihsawhna video hi siamin, celebrity chef lem changin 'Green Onion Bae' tih video chu a post a, video a post hnu lawkah hian man a ni zui bawk.
Lam hian Hanoi khawpuiah beef noodle dawr a nei a, an ram democracy dinhmun chungchangte a sawichhuah ṭhin bakah, anti-China protest-ah pawh a tel fo a ni. 
Danang police department chuan Lam hian official nuihsawhna video bakah hian, an ram sorkar sawiselna leh tihhmingchhiatna lam article leh video 25 chu social media-ah a post tawh tiin an sawi. Sorkar hming tichhia a, information leh document dik tawk lo takte a thehdarh ṭhin avangin thiam loh chantir a ni tih an sawi. 
Hetih lai hian Human Rights Watch-a deputy Asia director Phil Robertson chuan Vietnam sorkar hnenah Lam hremna chu titawp tur leh, Vietnamese Communist Pary sawisel avanga midang an lo hrem tawhte pawh titawp turin a phut.