Austria interior ministry chuan Nazi hotu, Adolf Hitler-a pianna leh a naupan laia a chenna in chu police officer-te tana human rights training centre-ah siam a ni dawn tih a puang. 
Kum 2019 aṭang khan Braunau am Inn-a Hitler-a pianna in siam danglamna tur hian Austria sorkar chuan ruahmanna a lo siam tawh a ni. He apartment building-ah hian Hitler hi kum 1889, April thla khan a piang a, kum thum a nih thlengin an chhungkuain an cheng a ni. Building neitu hi Gerlinde Pommer a ni a, kum 1972 aṭang khan interior ministry hian man chawiin a luahsak a ni. 
He building-ah hian Hitler hi kum reilote chauh cheng hman mah se, Nazi rorel lai hian a tan hmun pawimawh tak a ni chho a, a rorel lai khan a pianna in hi Nazi ngaisangtu tam takin an tlawh a, khualzin hiptu a ni chho a ni. Nazi rorelna a tawp hnuah, kum 1944 khan building hi khar a ni zui a, mahse a hnuah Austria sorkar chuan far-right tourist hoin an tlawh ṭhin danna atan buiding hi a luahsak ta a ni. Sorkarin a luahsak hnuah charitable organisation hrang hrangten awmna atan an hmang a, mahse kum 2011 aṭang kha chuan dah ruah a ni tawh. 
He building hi Austria sorkarin a leisak hnuah, offficial-te chuan kum 2019 khan police station-a siam tum a ni a, mahse official-te chuan a aia ṭangkai zawka hman theih a ni tiin, Austria rama police-te tana human rights organisation office lian berah siam an tum ta a ni. 
Building siamṭhatna tur project-ah hian USD mtd 21.5 ruahman a ni a, kum 2025-ah zawhfel hman beisei a ni bawk.