Sierre Leone rama an thingkung hmingthang, cotton tree chu Nilaini zan khan ruahsur leh thlipui na tak thawkin a len tlu a, he thingkung peng ṭhenkhat chu musuem-ah vawnṭhat an tum. 
President Julius Maad Bio chuan an ram khawpui, Freetown-a cotton tree hi kum za tela upa a ni tih sawiin, an rama mi hmasate zalenna chhinchhiahna pawimawh tak a ni bawk tih a sawi. He thingkung thlalak hi an ram pawisa note-ah pawh an dah tel a ni.
Feet 230-a sang cotton tree hi Sierre Leone rama thingkung upa ber zingah ngaih a ni a, an chhut danin kum 400 vel a ni tawh. Freedom Steps bul, metre 300 vela hlaah a ding a, sal chhuah zalente chu Freetown khuaa inbengbel tura an luhin he thingkung bulah hian an ṭawngṭai thin. An rama poet lar tak, Oumar Farouk Sesay chuan he cotton tree pual hian poem ziakin, Sierre Leone ram Eiffel Tower, Statue of Liberty, leh Big Ben titein a sawi. 
Hetih lai hian Kristian ṭhenkhat erawh thingkung zung (roots) te chu dawi lam thil tihna atan hman a ṭhin tiin, an duh loh thu an lo sawi fo thung. Faith Healing Bible Church pastor, Francis Mambu chuan tun hnaia thu a sawinaah pawh he thingkung hi a la tlu dawn a ni, tiin a sawi. 
Kar liam ta khan ruahsur nasa tak avangin thingkung zar ṭhenkhat a tliak a, hemi hnu Nilaini zan khan thlipui leh ruah thawk lehin thingkung hi a chhem tlu a ni.