Japan-a inpawng beihna thlengah mi 4 an thi

Japan ram Nagano region-ah Ningani khan mi pakhatin chem leh silai hmangin mi a pawng beih a, mi pali an thi. Thi zingah hian police officer pahnih an tel.

Police-te chuan nimin zing khan pawi­khawihntu hi an man thu leh, local politician fapa, kum 31 mi Masanori Aoki a ni tih an sawi bawk. A tirah chem a hmang phawt a, a hnuah police pahnihte chu a rifle-in a kap leh. Pawi a khawihna chhan tak hi hriat a la ni lo.

Pawi a khawih hnu hian Aoki hi Nakono khaw bula a pa inah a biru a, mahse police-te chuan umzuiin in hi an hual nghal a, nimin zing khan in aṭanga rawn chhuakin an man ta a ni.

Japan ramah hian silai hmanga pawikhawihna, a bikin police-te beihna hi a thleng khat hle a, khawvela tualthah thlen tlemna ber niin, silai khuahkhirhna dan khauh tak an hmang a ni. Civil mite chu airgun leh hunting rifle chauh kawl an phalsak a, silai lei tur chuan exam hautak tak leh mental health test an paltlang zel a ngai ṭhin a ni.

Nikum July thla khan prime minister hlui Shinzo Abe chu a campaign laiin, tualchher silai hmangin kah a ni a, a hnuah a hliam tuar loin a thi a ni. Thla liam ta khan Wakayama khuaah prime minister Fumio Kishida campaign lai chu pipe-bomb hmanga an beih avangin mi pakhat man a ni bawk. Vanneihthlak takin PM hian hliam engmah a nei lo a, a beitu hi thla thum chhung pyschiatric examination nei tura tih a ni bawk.