SKorea leh US sipaiten live-fire drill nei

South Korea leh US sipaite chuan Ningani aṭang khan North Korea-in a vau mek karah live-fire drill an nei.

North Korea ramri bul, Pocheon tlangdungah drill hi neih a ni a, drill-ah hian Howitzers leh battle tank-te hman a ni. He exercise-ah hian SKorea leh US sipai 2,500 vel an tel a, June thla laihawl thleng an nei ang.

SKorea defence ministry chuan exercise hi NKorea lamin nuclear leh missile hmanga a vauna ṭhin chhang let tura an inpeihzia leh, an sipaite theihna neihte lantirna a ni tih a sawi.

Kar liam ta khan NKorea state media chuan an ram hruaitu, Kim Jong-Un chuan military spy satellite hmasa ber kahchhuahna tur a pawmpui thu a tarlang a, Kim chuan US leh SKorea-in an vau ṭhinnate chhanlet a ṭul thu a sawi a ni. He satellite hian surveillance lamah nasa taka puiin, indo thlen palh thulhah chuan NKorea-in a target-te a kah fuh theihna turin a pui thei dawn a ni.

US leh SKorea sipaite hian tun hnaiah training exercise hrang hrang an nei a, heng zingah hian air leh sea drill pawh telin, US-B-1B bomber-te pawh an hmang tel a ni. Ram pahnihten joint drill an neih ṭhin hi NKorea lam chuan a helh ṭhin hle a, an ram beihna tura an inbuatsaihna niin a puh.