Putin-a'n border security thuamchakna tur thupek tichhuak

Russia president Vladimir Putin chuan Ukraine nena an indo meknaah, Russia-in Ukraine ram chhung a thunun mekna bialah Russia sipai leh civil mite awlsam zawka an chetvel theihna atan border security thuam chakna tur thupek a tichhuak.

Russia Federal Security Service (FSB) hnuaia border service branch-te chuan nimin khan Border Guard Day an hmang a, President Putin hian lawmpuina a hlan a ni. Russia-in a awp bial chhunga mipuite leh civil mite mamawhte thawn luh a, chetvelna awlsam leh chak zawk siamna turin border security chu thuam chak a ṭul tih a sawi.

Putin hian nikum September thla khan Ukraine-a region pali - Kherson, Zaporizhzhia, Luhansk leh Donetsk bialte chu an awp thu a lo sawi tawh. Mahse hei hi Ukraine lam chuan pawm loin, Russia sipaite chuan region palia hmun tlemte chauh an thunun niin a sawi ve thung.

Russia leh Ukraine hi tun hnaiah an inbei ngawrh chho leh hle a, Ukraine hian drone hmangin ramri hrula Russia ram chin a bei fo a, Inrinni khan Moscow hmarthlang lama oil pipeline pawh beih a ni. Mahse Ukraine hian Russia ram chhung leh, Russia thunun bial chhung beitu hi a nih thu official-in an sawilang ngai lo.

Russia-in a ram a luahsak te lalet tura theihtawp an chhuah thu erawh sawiin, Inrinni pawh khan an ram lalet tura na taka beih let an tum thu a sawi.