Imran Khan medical test-ah cocaine leh zu hmuh a ni : Pakistan Minister

Pakistan health minister Abdul Qadir Patel chuan an ram prime minister hlui, Imran Khan chu Islamabad-a Pakistan Institute of Medical Sciences-a medical test neihsak a nihin, cocaine leh zu a khawih tih hmuh a ni, a ti.

Kar liam taa press confe­rence a neihah, minister Patel chuan eiruk thubuaia Imran Khan man a nih khan, medical test hi neih a nih thu leh, a medical report hi doctor panga awmna panel in an buatsaih a nih thu a sawi. Minister thusawi hi a dik a nih chuan, thubuai tam tak nei mek, Imran Khan hi thubuai dang siamsak a ni leh ang.

Al-Qadir trust case-a man a nih khan, Imran Khan zun sample chu test turin Pakistan Institute of Medical Sciences ah lak a ni. Medical report chuan 'toxic chemical', zu leh cocaine hmuh a ni tih a tarlang niin Health Minister chuan a sawi. Khan-a medical report hi mipui hmuhah pho chhuah a ni dawn tih a sawi bawk.

Khan hi ruihho tia puh a nih ṭum khatna a ni lo a, a nupui hlui Reham Khan chuan PTI hotu hian ruihhlo a hip lai a hmuh thu a lo sawi tawh a ni.