Khawvelah mihring mtd 900 chuangin ei tur khamkhawp nei lo

United Nations Food and Agriculture Organisation (FAO) chuan khawvel mihring 10%, mi maktaduai 828 vel chu zan tin khamkhawp ei tur nei zo loin an mu ṭhin tih sawiin, nikum aiin an punna hi mtd 46 a tling a ni, a ti.

Ei tur khamkhawp nei zo lo zinga hmun thuma ṭhena hmun hnih hi hmeichhia niin, an zinga 80% chu sik leh sa inthlak danglam nasatna hmuna awmte an ni.

Ram hrang hranga kham­khawp ei tur nei zo tam tak an awm chungchang inzirtirna turin, non-profit The Hunger Project chuan May 28 chu World Hunger Day-ah a puang a ni.

Taska mamawh zat ei tur nei lo a, rilṭam taka hun rei tak awm hian taksa hriselna lamah harsatna siamin, a bikin naupangte zingah dam chhunga taksa lam harsatna neih phahnate a thlen thei bawk.

Khawvel huapin kham­khawp ei tur nei zo lo hi an pung chho zel. Kum 2019 - 2021 inkar khan taksa mamawh ei tur nei zo lo hi matkduai 150 chuangin an pung hman a, hetianga an pun chakna chhan hi tual­chhung buaina, sik leh sa inthlak danglam nasa, ram eco­nomy dinhmun chhia leh, Covid-19 hripui leng vangte an ni.

Ei leh in man a sang chak bawk a, kum 2019-2022 inkar khan khawvel huapin ei tur man sanna, FAO Food Price Index (FPI) chu 95.1 aṭangin 143.7-ah a kai hman bawk.

Kum 2022-a khawvela cereal, oilseeds leh fertiliser thawnchhuaktu ram lian pahnihna, Russia leh Ukraine indona a thlen aṭang khan khawvel pumah grain, fertiliser leh energy man pawh nasa takin a pung chho a, hei vang hian kum 2022 FPI chu a tisang a ni.