Turkey President atan Erdogan thlang nawn

Turkey ram President thar thlan thawh hnihnaah, president ṭanglai Recep Tayyip Erdogan chu thlan tlin a ni.

President thlan thawh khatna hi May 14 khan neih a ni a, candidate zingah tling tura vote hmuh ngai hmu pha an awm lo a, hei vang hian vote hmu sang pahnih, Erdogan leh Kemal Kilicdaroglu-ten inthlan thawh hnihna an hmachhawn.

Inthlan thawh khatnaah hian Erdogan chuan vote 49.52 hmuin, Kilicdaroglu chuan 47.86% a hmu a ni. Candidate pathumna, Sinan Ogan chuan vote 5.17% a hmu a, inthlan thawh hnihnaah Erdogan hi a thlawp a ni.

Pathianni khan inthlan thawh hnihna hi neih niin, Supreme Election Council chuan nimin khan Edrogan hian vote tla aṭangin 52.14% a hmu a, a khingpui Kemal Kilicdaroglu chuan 47.86% a hmu tih an sawi. Result erawh official-a puan a la ni lo.

President atana thlan nawn, kum 69 mi Erdogan hian Turkey ram hruaitu dinhmun hi kum 20 chelh tawhin Turkey President ni rei thei ber a ni mek a, thlan nawn a nih leh tak avangin kum nga dang ram hruaitu lu ber dinhmun hi a chelh leh dawn a ni. Kum 2003 khan prime minister atan lakluh a ni a, kum 2017-a an ram danpui siamṭha a, parliamentary system chu presidential system-a thlak a nih hnuah, kum 2018-ah President hmasa ber turin lakluh a ni zui leh a ni.

President palace kawta pungkhawmte hnenah Erdogan chuan a hnehna chan chu an ram mipuite tana hnehna a ni tiin, an ram tana hmathlir a neihte tihhlawhtling tura ram mipuite chu lungrual leh pumkhata awm turin a chah.