China-ah Covid-19 hri leng thar leh, lockdown puan erawh an tum lo

China ramah Covid-19 hri kai an pung thar leh a, mahse thuneitute chuan hri leng thar leh vang hian khuahkhirhna siam a, lockdown puan erawh an tum lo nia hriat a ni.

Covid-19 hri len ṭan tirh aṭangin China hian hri darh tur venna atan lockdown khauh takin a kalpui a, hun rei tak inkhuahkhirhna a kalpui hnuah nikum December thla khan 'Zero Covid' policy a siam chu a titawp chauh a ni.

Health department thuneitute chuan April thla aṭang khan hri kai an pung chho leh tih an sawi a, June thla tawp lamah a vanglai thlengin, kar khatah hri kai hi maktaduai 65 vel tling chho turin an chhut.

Nikum December thlaa Zero Covid policy tihtawp a nih khan hri kai hi an pung nghal a, ni khata hri kai thar maktaduai 37 an awm ṭum pawh a thleng niin report chuan a tarlang.