Japan PM-in a chetdan mawi loh avangin Executive secretary aṭangin a fapa a ban
Japan prime minister Fumio Kishida chuan executive secretary atana a ruat, a fapa Shotaro Kishida chu a chetdan mawi loh vangin a nihna aṭangin a ban tih a sawi.
Prime Minister hian a fapa, kum 32 mi Shotaro hi executive secretary for political affairs atan a ruat a, mahse nikum December thla khan Shotaro hian a official residence-a private party a buatsaih a, party naa an awm dan hian sawisel a hlawh zui hle. Kar liam ta khan an party lai thlalakte hi Shukan Bunshun chanchinbu chuan a tichhuak a ni.
Sawiselna tam tak a awm hnuah, PM chuan Thawhṭanni khan Shotaro chu a thiltih mawi lo tak vang hian a nihna aṭanga a ban tur thu reporter-ten an kawmnaah a sawi. Kishida chuan, "Official ni chunga a chetdan kha a mawi lo hle a, hei vang hian ka thlak dawn a ni," tiin Ningani-ah a thlaktu atan secretary dang, Takayohshi Yamamoto chu ruat a nih tur thu a sawi nghal bawk.
Chief cabinet secretary Hirokazu Matsuno pawhin official residence-a PM fapa-in party a buatsaih dan chu thil mawi lo tak a ni tiin, hetianga official residence-te dik lo taka hman a nih ṭhin venna turin hma lak a nih tur thu a sawi.
Shotaro Kishida hian a hma pawhin sawisel a lo tawk tawh bawk. Britain leh France-a a zin ṭumin, khawlai lenna atan embassy car a hmang a, luxury department-ah cabinet member-te tan souvenir-te a lei a, hetianga a chetdan hian sawizui pawh a lo hlawh tawh hle a ni.