Russia-in a zawnin zan 3 Ukraine khawpui a bei
Russia chuan Ukraine nena an indo meknaah tun hnaiah ngawrh zawkin beihpui a thlak chho leh a, Ukraine khawpui Kyiv-ah a zawnin zanthum air strike a nei.
Thawhṭanni zana Kyiv khawpui an beih lehnaah hian khawpui chhunga thil puak thawm ṭum eng emaw zat hriat a ni a, building eng emaw zat a kang bawk. Kyiv khawpui hi May thla hnua an beih ṭum 17-na a ni.
Ukraine oficial-te chuan air defence hmangin Russia drone 20 chuang an lo kapthla tih an sawi a, Kyiv khawpui beihnaah hian mi pakhat a thi tih an sawi bawk a ni.
Hetih lai hian nimin zing khan Russia khawpui, Moscow-ah pawh drone hmanga beih a ni ve bawk a, building ṭhenkhat a chhia niin mayor Sergei Sobyanin chuan a sawi. Mihring thi leh hliam erawh an awm lo niin a sawi. Russia thuneitute chuan an ram khawpui Moscow beihna atana drone kahchhuah eng emaw zat chu an lo kahthlak thu an sawi bawk.
Ukraine sipai hotute chuan Russia-in Kyiv khawpuia beihpui a thlak thar leh hnuah Kamikaze drone 20 chuang an lo kahchhiat sak tih sawiin, Ukraine president Volodymyr Zelenskyy chuan US siam Patriot air defence pek an ni chu lawmawm a tih thu a sawi. Thawhṭanni zana video hmanga a thuchah tihchhuahah, US air defence system hian Russia missile eng chi pawh a lo kapthla thei zel dawn a ni, a ti.
Russia sipaite chuan Ukraine an beih thar lehnaah, Kyiv bakah khawpui danga an target-te chu an fuh vek thei niin an sawi thung. Russia hian kamikaze drone bakah cruise leh ballistic missile-te a hmang tel a ni.