Sudan Army-in inremna zawnga inbiakna titawp

Sudan Army chuan tual­chhung indona thleng mekah, paramilitary force Rapid Support Forces (RSF) nena inremna zawnga inbiakna an neih chu a titawp.

Sudan-ah hian sipai hotu Abdel Fattah al-Burhan kaihhruai Sudan Army leh, a deputy Mo­hamed Hamdan Daglo kaih­hruai RSF-te hi thuneihna inchuhin April 15 aṭang khan an inbei tawh a, tualchhung indona thleng vang hian mi 1,800 chuangin nunna an chan tawh.

Tualchhung indona a thlen hnuah Sudan Army leh RSF hian inkahhai puang ṭhin mah se an zawm ṭha ngai lo a, a bawhchhetu zawkah an inpuh tawn a ni. US leh Saudi Arabia hmalaknain inkahhai rei zawk puang tura inbiakna an nei mek a, mahse nimin khan Army lam chuan inbiakna hi an nei zui tawh dawn lo tih a sawi.

Official chuan, a hmaa rei vak lo chhung atana inkahhai an lo puan tawhah pawh hel pawl lam, RSF lam hian an intiamnate engmah zawm loin, hospital leh residential building aṭang tein an inlachhuak duh lo a, inremna hi vawi tam tak an palzut avangin, inbiakna pawh nei chhunzawm tawh lo turin Army lam hian thutlukna hi an siam a ni, a ti.

Thawhlehni khan Army chief al-Burhan chuan an ram khawpui, Khartoum-a sipaite chu tlawhin, hnehna an chan hma chu sipaite hian an bei zel dawn tih a sawi. Sipai pawl pahnihte hi Khartoum bakah an ram khawthlang lam, Darfur bialah an la inbei ngawrh hle a ni.

United Nations chuan tual­chhung indona chhuah hnuah, himna zawnga ramchhung hmun danga tlanchhia hi mi maktaduai khat chuang an awm tawh a, ram pawnah mi 3,50,000 vel tlanchhe tawh bawkin, an zinga mi 1,70,000 vel chu Egypt ramah an lut niin a sawi. Sudan ram mipui zahve aia tam, mi maktaduai 25 vel chu venhim leh chhawmdawl ngaiin an awm mek a ni, a ti.

Sipai pawl pahnihte inbeih nasatna, Khartoum district pum­ah chuan in-ah tui herhhaw theih a ni tawh lo a, electric pawh kar khatah darkar reilote chauh tihen niin, indona bial chhunga hospital awm zinga hmun lia ṭhena hmun thum chu hna thawk thei loin an awm tawh bawk.