Uganda-in mahni anpui kawpte thi tura hrem theihna dan siam

Uganda ram chuan mahni anpui kawp khapna, anti-LGBTQ law khauh tak a siam thar a, mahni anpui kawpte chu thi tura hremna pek theihna dan pawh siam tel a ni.

Uganda ram bakah Africa ram 30 chuangah mahni anpui kawp hi khap mek a ni. Mahse tun ṭuma Uganda president Yoweri Museveni-a'n a hming ziah hnana a pawm tak hi khawvela mahni anpui kawp khapna dan siam tawha a khauh ber zinga mi a ni.

Dan thar siam hnuaiah hian mahni anpui kawp aṭanga natna hlauhawm HIV/AIDS thehdarhte chu thi tura hremna pek theih an ni dawn a, hei bakah hian anpui kawp chawilar tute chu kum 20 thleng lungin tantir theih an ni bawk ang.

Khawthlang ramte chuan Uganda ram dan siam thar hi na takin an sawisel a, an dan siam thar hian Uganda ramin chhawmdawlna dawn ṭhin thlengin a nghawng thei dawn niin an sawi. US president Joe Biden chu a sawiseltu zingah telin, Uganda leh US thawhdunna hrang hrang pawh an zirchiang leh dawn niin a sawi.

Hetih lai hian Uganda ṭhenawm, Kenya leh Tanzania pawhin anpui kawp khapna dan khauh zawk hi an siam ve leh rin a ni. Kenya MP George Kaluma chuan dan khauh tak siam kawnga hma hruaitu Uganda President chu fakin, mihring nihna dik tak venhimna turin Kenya chuan an hnung a zui dawn tih a sawi.