June 12-ah Myanmar-a UN special envoy a chawl tawh dawn

United Nations-in Myamnar rama special envoy atana a ruat, Noeleen Heyzer-i chu June 12 aṭangin a chawl tawh dawn. A thlaktu tur ruat a ni ang.

Kum 2021, February thlaa Myanmar sipaiten civil sorkar thuneihna hnehchhuh a, thuneihna an chan hnuah tualchhung buaina a la thleng reng a, sipai sorkar dodaltute leh helpawl hrang hrangte an la inbei chhunzawm reng a ni.

United Nations leh Association of Southeast Asian Nations (ASEAN) bloc chuan Myanmar tualchhung buaina titawp a, inremna a awm theihna atan kawng hrang hrangin hma la mah se, tun thlengin awmzia a la nei thei lo a ni.

Kum 2021, October thla khan UN secretary-general Antonio Guterres chuan Noaleen Heyzer hi Myanmar rama special envoy atan a ruat a, thla 18 chhung thawk turin a ti a ni. A contract hi June 12 hian a tawp dawn a, a chawl zui tawh dawn tih UN chief thupuangtu, Stephane Dujarric chuan a sawi.

Singapore sociologist,, Heyzer-i hi inremna a awm theihna atana Myanmar sipaite leh eptu pawlte inbiakna neihtir tur leh, sipaiten civil mite an beihna ṭhin titawp tura hma la tura tih a ni. Nikum August thla khan Myanmar hi tlawhin, sipai hotu lu ber general Min Aung Hlaing leh sipai hotu dangte a hmu a, mahse civil sorkar hotu Aung San Suu Kyi erawh hmuh an phalsak lo. Sipaite chuan UN palai-in an ram chungchanga thuchhuah a siamte chu ṭan lam bik neia puhin an sawisel zui bawk. Heyzer-i chuan Suu Kyi-i hmuh phalsak a nih loh chuan Myanmar ram tlawh a tum tawh loh thu a sawi zui ve bawk a ni.

UN hotu Guterres chuan UN special envoy atana ruat a nih chhunga Heyzer-in Maynmar rama boruak ṭha a awm theina atan te, Myanmar mipuite tana theihtawp a chhuahna chu fakawm a tiin, a chungah a lawm hle tih a sawi.